全年計劃 vs 單次計劃
唔少港人一年外遊幾次，如果每次旅行都要購買一次旅遊保險，除咗麻煩，總保費亦可能唔少。全年旅遊保險只需投保一次，往後一整年旅遊都可獲保障，保障期為十二個月，一般唔限次數；而單次旅遊保險則按旅程投保，保費通常較低，以五日日本之旅為例，一般介乎一百至五百港元左右。
每次旅程保障時間上限係關鍵
揀全年旅遊保險前，最緊要留意每次旅程嘅保障時間上限。市場上大部分全年計劃每次旅程嘅保障上限約為九十日，適合一般短途同中長途旅行；但如果單次旅程時間好長，例如去歐美探親近半年，就應該考慮單次旅行計劃，因為呢類計劃嘅保障期一般可以長達一百八十日，覆蓋更完整。
幾時買全年先抵？
全年旅遊保險嘅保費普遍約二千港元左右。以短途旅行為例，如果一年去六至十次，買全年計劃已經回本，抵過逐次購買單次保險。相反，如果每年只去一、兩次短途旅行，買單次計劃會較為化算。實際邊款抵，視乎外遊次數、去長途定短途，以及會唔會頻密探親或公幹。
投保前仲要留意啲咩？
除咗保障時間，投保前亦應比較各計劃嘅醫療保障、緊急支援、個人財物同旅程受阻等項目，並留意最大受保年齡同不保事項。如果能夠及早預計未來一年嘅外遊行程，就可以更準確比較全年同單次計劃，揀啱自己需要嘅保障。
