點解剖腹產寶寶免疫力受關注？
嬰兒嘅免疫細胞大約七成集中喺腸道，腸道菌群嘅平衡，對免疫系統發展非常關鍵。本地大學研究發現，剖腹產寶寶因為冇經過產道自然分娩，體內嘅產道益菌數目近乎零，腸道菌群建立相對緩慢，影響免疫力發展，亦增加過敏同呼吸道問題嘅風險。呢個發現令不少父母開始關注剖腹產寶寶嘅健康基礎。
腸道菌群同免疫力有咩關係？
自然分娩時，寶寶經過母親產道，會接觸到雙歧桿菌等有益菌群，幫助佢建立健康嘅腸道菌群，降低過敏同感染風險。相反，剖腹產寶寶缺少呢一步，腸道微生態更容易失衡。兒科醫生解釋，正因為腸道菌群影響免疫系統，點樣補充有益菌、維持菌群平衡，就成為支持剖腹產寶寶健康成長嘅重要一環。
免疫發展係一個長期過程
好多家長以為照顧好寶寶頭六個月嘅免疫力就足夠，但其實免疫系統嘅發展長達數年，一般要到大約三歲先慢慢穩定。隨住寶寶長大，開始返學前班、參與社交活動，接觸外界環境嘅機會增加，生病的風險自然上升。所以喺三歲之前持續加強免疫力，比單單重視頭半年更重要。
家長可以點樣支持？
母乳始終係嬰兒最理想嘅營養來源，含有豐富抗體同益生元，有助建立健康腸道菌群。如果因為各種原因需要以配方奶粉補充，家長可以同醫護人員商討，選擇適合寶寶需要嘅配方。均衡營養、充足睡眠、適量曬太陽同戶外活動，都係支持小朋友免疫系統發展嘅日常基本功。
